Deu 27:1-8 | CYM | STEP | Yna dyma Moses, ac arweinwyr Israel gydag e, yn dweud wrth y bobl, “Cadwch y gorchmynion dw i'n eu rhoi i chi heddiw.

‏ Deuteronomy 27:1-8

1 Yna dyma Moses, ac arweinwyr Israel gydag e, yn dweud wrth y bobl, “Cadwch y gorchmynion dw i'n eu rhoi i chi heddiw. 2 Pan fyddwch chi'n croesi'r Afon Iorddonen i'r wlad mae'r Arglwydd eich Duw yn ei rhoi i chi, rhaid i chi godi cerrig mawr ac yna rhoi plastr drostyn nhw. 3 Yna ysgrifennu copi o'r gorchmynion yma arnyn nhw. Wedyn gallwch fynd i mewn i'r wlad – tir ffrwythlon lle mae llaeth a mêl yn llifo, fel gwnaeth yr Arglwydd, Duw eich hynafiaid, ddweud wrthoch chi. 4 Mae'r cerrig yma gyda plastr drostyn nhw i gael eu codi ar Fynydd Ebal. 5 Yna dylech adeiladu allor yno i'r Arglwydd eich Duw – allor o gerrig sydd heb eu naddu gydag offer haearn. 6 Defnyddiwch gerrig cyfan i adeiladu'r allor, yna cyflwyno offrymau arni – offrymau i'w llosgi'n llwyr i'r Arglwydd eich Duw. 7 Hefyd offrymau i gydnabod daioni'r Arglwydd, a gallwch wledda a dathlu o flaen yr Arglwydd eich Duw. 8 Peidiwch anghofio ysgrifennu copi o'r gorchmynion yma ar y cerrig sy'n cael eu gosod i fyny, a gwnewch yn siŵr eu bod nhw i'w gweld yn glir.”